ما احساسك.....

يسئلني الصحفي ما احساسك

ما احساسك وانت الان بنص اوربا

في قمه عصر التقنيه

ما احساسك وانته تباوع وجه الصحفي

ابيض من صدر الصحفيه

ما احساسك لو عندك حاسوب وانترنيت واتراسل كله باي ميل

ومتحس بغربه وحنيه

نقالك عبر الاقمار ايطلع وجه امك يوميه

ما احساسك لو فتحت كلبك والحصوه

بل ليزر يداون كلهن وما تحتاج لاي عمليه

ما احساسك لو بل ليزر محو امراضك

اسهل من محو الاميه
ما احساسك لو ردت اوليد ايشيل اسمك

تاخذ بتك للمستشفى واتحورها هرمونات

وحتى الولد ايصير ابنيه

ما احساسك لو عل غيم اتعلت شقتك

والنجمه اتطب من نافذتك

وتبات بحضنك ليليه

احساسي اتلفضه بانفاسك من اني اسئل وانته اتجاوب

ما احساسك

ما احساسك لو يتبدل حالك حالي

وناسك ناسي

وناسي بناسك

ما احساسك لو تنسى الشقق الجويه

ما احساسك لو تصبح اكثر شعبيه

ما احساسك لو تسكن بل طهمازيه

ما احساسك لو كلساعه امأجر غرفه

ومنكل اجوالاتك يوميه

لا من شغله ولا يوميه وضلت بجيوبك بس ميه

ما احساسك بيش اتجيبون الكميه

ما احساسك لو صوبتكم ما تتعله ولا تتنصه ولا تطفه

الا اتبخ فوكاه اميه ..

ما احساسك لو وكتك ضكك فد نوب

تداين خبزات وروبه

وخبز وروبه وخبز وروبه وخبز وافرض

جيرانك ضكتك خويه انطيني افلوس الروبه

ما احساسك من تضطر اتبيع الصوبه

ما احساسك من تفتر بسوك الجمعه

وشايلك من بيتك سلعه

عمي بتسعه ..؟ عمي اتوكل بالله بسبعه ..

شايف خير وتستاهلها سلعت بيتي ابيتك خلها ..

ومن يكعد يحسب بفلوسك وي كل ورقه اتنزل دمعه ..

ما احساسك لو يوم تخلص كميتك

والجوع ايلوج ابزريتك..

تبجي ادموعك..

تبجي اعيونك

بجيك ما يترس صينيتك..

اتكوم اتدعي وانته اتصلي باصدق نيتك

يارب ياريتك ترحمنه

يا رب ياريتك ترزقنه

يا رب ياريتك تنصرنه

يا رب يا ريتك يا ريتك والصاروخ ايطيح ابيتك..

ما احساسك لو نص ابنك طك ابراسك

ما احساسك لو كتلك اترك احزانك

حس بشعبك وبجيرانك

ما احساسك لو عينك شافت بنتين

بعمر الخمسه وست اسنين

رادن يمشن رادن مره ابلعبه ايركضن

بس ما كدرن متعوقات بلا رجلين

واتخيل عدهن رجلين ويلعبن حليه ابراسك

ما احساسك ..

ما احساسك لو مريت بسوك وبتك كالتلك بابا جوعانه

تكسر كلبك اتكوم اتمد ايدك بجوبك تلزم فخذك ماكو بطانه

وثكل الدمعه ايدنك راسك موللكاع لشفت بنتك

انقهرت كلش باستك مالازم بابا وندمانه

تسمع صوت ايصيح ادفعلي

صوت الثاني ايكلك اني

لا انه وانه ولا انه واتباوع كلهم ديانه

اشرف واحد بل ديانه يتجرء مد ايده ابجيك

لكه بس رجليك العريانه ماكو بطانه

طلع ايده راح الاول راح الثاني راح الخامس

ما احساسك فخذك يعلن عن افلاسك

ما احساسك لو راسك بي لعب الشيطان

وبكلبك قل الايمان

شنو هل عيشه خوف وذله وحرب وضلم وجور ودربك ما تكدر تندله

وما تملك بل دنيا جكاره هم حاسب نفسك انسان

سويلك يمعود جاره تكوم اتصيح يا شيطان يا شيطان

بس عد الله اهناك الجاره بس عد الله اهناك الجاره

واتجيت جوه السياره

ما احساسك لو داس ابريك وما داسك

ما احساسك لو اني السبب بألامكواتجسر واوكف كدامكواجرء واسئل

ما احساسك

احساسي اتلفضه بانفاسك من اني اسئل وانته اتجاوب ....؟؟

ما احساسك..


ابوعبود